मलकापूर तालुक्यात अवैध रेती वाहतुकीवर मोठी कारवाई
८ टिप्पर जप्त, रेती माफियामध्ये खळबळ — पोलीस अधीक्षक निलेश तांबे यांचे धडक पथक…
बुलढाणा | प्रतिनिधी
बुलढाणा जिल्ह्यात अवैध रेती वाहतुकीवर आळा घालण्यासाठी जिल्हा पोलीस अधीक्षक निलेश तांबे यांच्या विशेष पथकाने मलकापूर तालुक्यात मोठी धडक कारवाई केली आहे. या कारवाईत अवैधपणे रेती वाहतूक करणारे तब्बल ८ टिप्पर पकडण्यात आले असून ते जप्त करण्यात आले आहेत.
गेल्या काही दिवसांपासून मलकापूर तालुक्यातील नद्या व नाल्यांतून मोठ्या प्रमाणात बेकायदेशीर रेती उपसा व वाहतूक होत असल्याच्या तक्रारी वाढत होत्या. महसूल व पाटबंधारे विभागाकडून अपेक्षित कारवाई होत नसल्याने अखेर पोलीस विभागाने स्वतः पुढाकार घेत ही कारवाई केली.
पोलीस पथकाने अचानकपणे विविध ठिकाणी नाकाबंदी करून संशयित टिप्पर तपासले असता त्यांच्याकडे कोणतेही वैध परवाने, रॉयल्टी पावत्या किंवा अधिकृत कागदपत्रे नसल्याचे आढळून आले. त्यानंतर सर्व टिप्पर ताब्यात घेऊन पोलीस ठाण्यात आणण्यात आले.
या कारवाईमुळे रेती माफियांमध्ये मोठी खळबळ उडाली असून अनेक ठिकाणी अवैध रेती वाहतूक तात्पुरती बंद झाल्याचे चित्र आहे. परिसरातील नागरिकांनी पोलीस प्रशासनाच्या या ठोस कारवाईचे स्वागत केले आहे.
जिल्हा पोलीस अधीक्षक निलेश तांबे यांनी स्पष्ट शब्दांत सांगितले की,
“अवैध रेती उपसा व वाहतूक ही पर्यावरणाची हानी करणारी आणि कायद्याचा भंग करणारी बाब आहे. यापुढेही अशी कारवाई अधिक तीव्र केली जाईल. कुणालाही पाठीशी घातले जाणार नाही.”
दरम्यान, जप्त टिप्परवर महसूल विभागामार्फत दंडात्मक कारवाई करण्यात येणार असून संबंधित चालक व मालकांविरुद्ध कायदेशीर गुन्हे दाखल करण्याची प्रक्रिया सुरू आहे.
ही कारवाई म्हणजे अवैध व्यवसाय करणाऱ्यांना थेट इशारा मानली जात असून जिल्ह्यात कायद्याचे राज्य प्रस्थापित करण्यासाठी पोलीस प्रशासन सज्ज असल्याचा स्पष्ट संदेश यातून देण्यात आला आहे.