बुलढाणा ब्रेकिंग..
*सलग नऊ महिने राज्यात अव्वल कामगिरी; बुलढाण्याला ‘राज्यस्तरीय आरोग्य रत्न’ सन्मानाने गौरव!*
*पॅलिएटिव्ह केअर, मेनोपॉज क्लिनिक आणि एनसीडी उपक्रमांचा प्रभाव;*
*जिल्हा आरोग्य यंत्रणेच्या सातत्यपूर्ण कामगिरीची दखल..*
बुलढाणा जिल्ह्याने सार्वजनिक आरोग्य क्षेत्रात सलग नऊ महिने राज्यातील पहिल्या पाच जिल्ह्यांमध्ये स्थान पटकावत उल्लेखनीय कामगिरी केली आहे. या सातत्यपूर्ण आणि गुणवत्तापूर्ण कार्याची दखल घेत जिल्ह्याला राज्यस्तरीय ‘आरोग्य रत्न’ सन्मानाने गौरविण्यात आले आहे. राज्याच्या आरोग्य विभागामार्फत दिला जाणारा हा सन्मान जिल्ह्यातील संपूर्ण आरोग्य यंत्रणेच्या टीमवर्कचा आणि प्रभावी अंमलबजावणीचा मानबिंदू ठरला आहे.
*सर्वसमावेशक आरोग्य सेवेचा विस्तार..*
गेल्या काही वर्षांत जिल्हा आरोग्य विभागाने विविध नाविन्यपूर्ण उपक्रम राबविले. पॅलिएटिव्ह केअर सेवांचा विस्तार करून गंभीर आणि असाध्य रुग्णांना दिलासा देणारी उपचारपद्धती अधिक सक्षम करण्यात आली. महिलांच्या आरोग्याकडे विशेष लक्ष देत मेनोपॉज क्लिनिक सुरू करण्यात आले, ज्यामुळे मध्यमवयीन महिलांना तज्ज्ञ मार्गदर्शन व उपचार उपलब्ध झाले… यासोबतच एनसीडी (Non-Communicable Diseases) कार्यक्रमांतर्गत मधुमेह, उच्च रक्तदाब, कर्करोग यांसारख्या असंसर्गजन्य आजारांच्या तपासणी व उपचारासाठी विशेष मोहीम राबविण्यात आली. ग्रामीण भागात आरोग्य शिबिरे घेऊन तपासणी व उपचार सेवा थेट लोकांपर्यंत पोहोचविण्यात आल्या.
*डिजिटल प्रणाली व नियोजनबद्ध कामकाजाचा परिणाम..*
आरोग्य सेवेत डिजिटल नोंदणी प्रणालीचा प्रभावी वापर, नियमित आढावा बैठकांचे आयोजन, काटेकोर नियोजन आणि वेळेवर अंमलबजावणी यामुळे जिल्ह्याची कामगिरी सातत्याने उंचावली. आरोग्य अधिकाऱ्यांपासून ते आशा वर्करपर्यंत सर्व स्तरांवरील कर्मचाऱ्यांनी समन्वयाने काम केल्यानेच हा सन्मान शक्य झाल्याचे वरिष्ठ अधिकाऱ्यांनी नमूद केले.
*अधिकाऱ्यांची प्रतिक्रिया..*
जिल्हा आरोग्य अधिकारी डॉक्टर अमोल गिते यांनी सांगितले की, “हा पुरस्कार केवळ वैयक्तिक यश नसून संपूर्ण आरोग्य यंत्रणेच्या सामूहिक प्रयत्नांचा परिणाम आहे. अधिकारी, कर्मचारी आणि आरोग्य सेविकांच्या सातत्यपूर्ण कामामुळे जिल्ह्याला हा मान मिळाला. पुढेही अधिक गुणवत्तापूर्ण सेवा देण्याचा आमचा प्रयत्न राहील.”
*भविष्यातील दिशा…*
या सन्मानामुळे जिल्हा आरोग्य यंत्रणेचा आत्मविश्वास वाढला असून, आरोग्य सेवांचा दर्जा अधिक उंचावण्यासाठी नव्या योजना राबविण्याचा मानस व्यक्त करण्यात आला आहे. ग्रामीण व दुर्गम भागातील नागरिकांना दर्जेदार व तातडीची आरोग्य सेवा उपलब्ध करून देणे, हेच पुढील ध्येय असल्याचे प्रशासनाने स्पष्ट केले…
राज्यस्तरीय सन्मानामुळे बुलढाणा जिल्ह्याच्या आरोग्य क्षेत्रातील कामगिरीची राज्यभर दखल घेतली जात असून, हा पुरस्कार संपूर्ण जिल्ह्यासाठी अभिमानाचा ठरला आहे