बुलढाणा
*पीडब्ल्यूडीमध्ये दिव्यांग लिपिकाकडे पाच टेबलांचा कारभार…*
*इतर कर्मचाऱ्यांना मात्र कामाचा अभाव?..*
*सार्वजनिक बांधकाम विभागात मनमानीचा आरोप; बदली, टेबल वाटप आणि निविदा प्रक्रियेवर प्रश्नचिन्ह*
बुलढाणा येथील सार्वजनिक बांधकाम विभागात (PWD) कार्यालयीन कारभाराच्या वाटपाबाबत गंभीर प्रश्न उपस्थित झाले आहेत. कार्यालयात पुरेसे कर्मचारी उपलब्ध असतानाही एका दिव्यांग लिपिकाकडे तब्बल पाच महत्त्वाच्या टेबलांचा कार्यभार सोपविण्यात आल्याचा आरोप समोर आला आहे. यामुळे विभागातील इतर कर्मचाऱ्यांमध्ये नाराजीचे वातावरण निर्माण झाले असून कार्यपद्धतीवरही प्रश्नचिन्ह उपस्थित केले जात आहे. माहितीनुसार, संबंधित दिव्यांग लिपिकाकडे लेखा, अर्थ, निविदा, भांडार तसेच ठेकेदारांशी संबंधित महत्त्वाच्या शाखांचा कारभार देण्यात आला आहे. नियमांनुसार अशा प्रकारचा अतिरिक्त कार्यभार अनेक कर्मचाऱ्यांमध्ये विभागून देणे अपेक्षित असताना एका व्यक्तीकडेच सर्व जबाबदाऱ्या केंद्रित करण्यात आल्याचा आरोप आहे. यामुळे पारदर्शकता आणि प्रशासकीय संतुलनाबाबत शंका व्यक्त केली जात आहे. याशिवाय कार्यालयात कार्यरत असलेल्या काही कर्मचाऱ्यांकडे कोणतेही ठोस काम नसल्याची चर्चा असून, त्यांना केवळ वेतन मिळत असल्याचा आरोपही केला जात आहे. दुसरीकडे, एका कर्मचाऱ्यावर मोठ्या प्रमाणात कामाचा ताण टाकण्यात आल्याने विभागाच्या कार्यक्षमतेवर परिणाम होत असल्याची भावना व्यक्त केली जात आहे. निविदा प्रक्रियेसंदर्भातही काही गंभीर मुद्दे समोर आले आहेत. विभागातील डिजिटल सिग्नेचर (DSC) आणि संगणकीय प्रक्रिया कार्यालयाबाहेरील संगणक केंद्राच्या माध्यमातून हाताळली जात असल्याची माहिती समोर आली आहे. ही बाब संवेदनशील मानली जात असून निविदा प्रक्रियेच्या गोपनीयता व सुरक्षिततेबाबत प्रश्न उपस्थित केले जात आहेत.
दरम्यान, विभागात बदली आणि पदस्थापनेच्या हालचाली सुरू असल्याची माहिती असून काही कर्मचाऱ्यांना त्यांच्या पसंतीच्या ठिकाणी बसविण्यासाठी प्रयत्न सुरू असल्याचीही चर्चा आहे. या संपूर्ण प्रकरणाची उच्चस्तरीय चौकशी करून कार्यभार वाटप, निविदा प्रक्रिया आणि कर्मचारी व्यवस्थापनातील अनियमितता तपासावी, अशी मागणी कर्मचारी व नागरिकांमधून होत आहे. या आरोपांबाबत संबंधित विभागीय अधिकाऱ्यांची भूमिका अद्याप स्पष्ट झालेली नसून, प्रशासनाने याकडे गांभीर्याने लक्ष देण्याची गरज व्यक्त होत आहे.