बुलढाणा
*संवेदना प्रतिष्ठानची दशकपूर्ती सामाजिक उपक्रमातून साजरी; पांगरी येथील धम्मकिरण विपश्यना केंद्रात फळवृक्षांची लागवड…*
*दशकपूर्तीचे औचित्य साधून संवेदना प्रतिष्ठानचा पर्यावरण संवर्धनाचा संकल्प; चिकू, फणस, पपईसह विविध रोपांचे वृक्षारोपण*
सामाजिक क्षेत्रात कार्यरत असलेल्या संवेदना प्रतिष्ठान या सामाजिक संघटनेला दहा वर्षे पूर्ण झाल्याच्या निमित्ताने दशकपूर्तीचा आनंद सामाजिक व पर्यावरणपूरक उपक्रमातून साजरा करण्यात आला. यानिमित्त प्रतिष्ठानच्या सर्व सदस्यांनी पांगरी येथील धम्मकिरण विपश्यना केंद्राला भेट देऊन विविध फळझाडांची लागवड केली. या उपक्रमातून पर्यावरण संवर्धनाचा संदेश देतानाच निसर्गाशी नाते अधिक दृढ करण्याचा प्रयत्न करण्यात आला.
पांगरी येथील धम्मकिरण विपश्यना केंद्रात वृक्षारोपणाचा कार्यक्रम पार पडला, त्यावेळी केंद्रामध्ये साधना सुरू होती. शांत आणि प्रसन्न वातावरणात झालेल्या या उपक्रमात चिकू, फणस, पपई, कडीपत्ता यांसह विविध फळझाडांच्या रोपांची लागवड करण्यात आली. कृषी अधिकारी विजय जाधव यांनी यावेळी वृक्षारोपणाबाबत मार्गदर्शन केले. झाडांचे संगोपन, पर्यावरणाचे महत्त्व आणि वृक्षलागवडीची आवश्यकता याविषयी त्यांनी मार्गदर्शन केल्याने या उपक्रमाला विशेष महत्त्व प्राप्त झाले.
प्रा. कंकाळ सर आणि प्राचार्य प्रशांत इंगळे सर यांच्या नेतृत्वाखाली हा वृक्षारोपण कार्यक्रम राबविण्यात आला. संवेदना प्रतिष्ठानच्या दशकपूर्तीचे औचित्य साधून आयोजित करण्यात आलेल्या या उपक्रमात प्रतिष्ठानचे सर्व सदस्य सहभागी झाले होते.
दहा वर्षांच्या सामाजिक वाटचालीचा पर्यावरणपूरक जागर घडविणाऱ्या या उपक्रमातून वृक्षलागवड आणि वृक्षसंवर्धनाचा संदेश देण्यात आला. केवळ रोपे लावण्यापुरते मर्यादित न राहता त्यांचे संगोपन करण्याची जाणीव समाजात निर्माण होणे आवश्यक आहे. अशा उपक्रमांमुळे पर्यावरण संवर्धनाला हातभार लागण्याबरोबरच सामाजिक बांधिलकीही अधिक बळकट होते.