*बुलढाणा फ्लॅश*
*बुलढाण्याच्या पार्थ पवारची सुवर्णभरारी! राष्ट्रीय बॉक्सिंग स्पर्धेसाठी निवड; स्वराज शिंदेला कांस्यपदक….*
*राज्यस्तरीय शालेय बॉक्सिंग स्पर्धेत बुलढाणा बॉक्सिंग अकॅडमीच्या खेळाडूंची दमदार कामगिरी; जिल्ह्याच्या शिरपेचात मानाचा तुरा…*
राज्यस्तरीय शालेय बॉक्सिंग स्पर्धा २०२६-२७ मध्ये बुलढाणा बॉक्सिंग अकॅडमीच्या खेळाडूंनी उल्लेखनीय कामगिरी करत जिल्ह्याचा नावलौकिक वाढवला आहे. पार्थ शिवाजी पवार याने ७० ते ७५ किलो वजन गटात सुवर्णपदक पटकावत राष्ट्रीय स्तरावरील स्पर्धेसाठी निवड मिळवली, तर स्वराज शत्रुघ्न शिंदे याने ८० किलोवरील वजन गटात कांस्यपदक जिंकले. क्रीडा व युवक सेवा संचालनालय, महाराष्ट्र राज्य, पुणे तसेच जिल्हा क्रीडा अधिकारी कार्यालयाच्या माध्यमातून आयोजित या स्पर्धेत पार्थ पवार याने उत्कृष्ट खेळाचे प्रदर्शन केले. प्रतिस्पर्ध्यांविरुद्ध सलग तीन लढती जिंकत त्याने सुवर्णपदकावर आपले नाव कोरले. या यशामुळे त्याची राष्ट्रीय स्पर्धेसाठी निवड झाली असून, आता राष्ट्रीय स्तरावरही त्याच्या कामगिरीकडे क्रीडाप्रेमींचे लक्ष लागले आहे. दुसरीकडे, स्वराज शत्रुघ्न शिंदे याने ८० किलोवरील वजन गटात नागपूर विभागाच्या खेळाडूवर विजय मिळवत कांस्यपदक पटकावले. जिद्द, आत्मविश्वास आणि कौशल्याच्या जोरावर त्यानेही आपली गुणवत्ता सिद्ध केली. दोन्ही खेळाडू बुलढाणा जिल्हा ॲम्युचर बॉक्सिंग असोसिएशनअंतर्गत कार्यरत बुलढाणा बॉक्सिंग अकॅडमीमध्ये प्रशिक्षक मोहम्मद सुफियान यांच्या मार्गदर्शनाखाली नियमित सराव करतात. कठोर मेहनत, शिस्त आणि सातत्यपूर्ण सरावाच्या बळावर त्यांनी हे यश संपादन केले. पार्थच्या सुवर्णपदकामुळे बुलढाण्याच्या शिरपेचात मानाचा तुरा रोवला गेला असून, स्वराजच्या कांस्यपदकानेही जिल्ह्याच्या क्रीडा क्षेत्राची मान उंचावली आहे. या यशाबद्दल दोन्ही खेळाडूंचे, प्रशिक्षकांचे आणि अकॅडमीचे क्रीडा क्षेत्रातून अभिनंदन होत आहे.